November 27, 2021

பரமக்குடி அருகே கூட்டுறவு வங்கியில் தங்க முலாம் பூசப்பட்ட கவரிங் நகைகளை வைத்து நூதன மோசடி கண்டுபிடிக்கப்பட்டுள்ளது….

1 min read
Spread the love

ராமநாதபுரம் மாவட்டம், பரமக்குடி தாலுகாவிற்கு உட்பட்ட நயினார்கோவில் ஒன்றியம் பி. கொடிக்குளம் கிராமத்தில்  தொடக்க வேளாண்மை கூட்டுறவு கடன் சங்கம் உள்ளது. இந்த சங்கத்தின் கிளை அலுவலகம் அருகே உள்ள கிளியூரில்  செயல்பட்டு வருகிறது. கடந்த கால ஆட்சியில் விவசாயிகளுக்கு தங்க நகை கடன் வழங்கியதில் பல்வேறு முறைகேடுகள் நடந்துள்ளதாக வந்த தகவலை அடுத்து ஒவ்வொரு கூட்டுறவு சங்கத்திற்கும் ஆய்வு மேற்கொள்ள அதிகாரிகள் நியமிக்கப்பட்டு ஆய்வு செய்து வருகின்றனர்.

இந்நிலையில், கிளியூர்  கிராமத்தில் உள்ள தொடக்க வேளாண்மை கூட்டுறவு கடன் சங்கத்தில் அதிகாரிகள் ஆய்வு மேற்கொண்டனர். அப்போது ஆய்வின் போது அடகு வைத்த நகைகளை ஒவ்வொன்றாக சோதனை செய்து வந்தனர். அதில் சந்தேகத்திற்கு இடமளிக்கும் வகையில் உள்ள பாக்கெட்டுகளை ஆய்வு செய்து உரசிப் பார்த்த போது தங்க முலாம் பூசப்பட்ட கவரிங் நகைகளை வைத்துள்ளது தெரிய வந்தது. அதன் பின் சங்கத்தில் உள்ள அனைத்து நகைகளையும் ஒவ்வொன்றாக தொடர்ந்து சோதனை மேற்கொண்டதில் சுமார் 74  பாக்கெட்டில் வைத்துள்ள தங்க முலாம் பூசப்பட்ட கவரிங் நகைகள் என்பது தெரிய வந்துள்ளது.

இந்த 74  பாக்கெட்டுகளில் உள்ள நகைகளுக்கு  கொடுக்கப்பட்ட தொகையின் மதிப்பு சுமார் ஒரு கோடியே 47 லட்சம் ரூபாய் ஆகும். இதனால் உடனடியாக ஆய்வு செய்த அதிகாரிகள் சம்பந்தப்பட்ட மாவட்ட நிர்வாக அதிகாரிகளுக்கு தகவல் தெரிவித்தனர்.  தகவலின்பேரில் அதிகாரிகள் சம்பந்தப்பட்ட நபர்களை பிடித்து தீவிர விசாரணை மேற்கொண்டு வருகின்றனர்.

மேலும் எண் என் 406 பி. கொடிக்குளம் தொடக்க வேளாண்மை கூட்டுறவு கடன் சங்கத்திலும்
இதேபோன்ற மோசடிகள் நடைபெற்று உள்ளதா ? என்று அதிகாரிகள் தொடர்ந்து ஆய்வில் ஈடுபட்டு வருகின்றனர். இச்சம்பவம் நகைகளை அடகு வைத்துள்ள விவசாயிகள் மத்தியில் அதிர்ச்சியை ஏற்படுத்தி உள்ளது. இதனால் அந்த வங்கிகளில் தங்க நகைகளை வைத்துள்ள விவசாயிகள் வந்து தங்களது நகை உள்ளதா ? என்பதை ஆய்வு செய்து வந்த வண்ணம் உள்ளனர். இச் சம்பவம் ராமநாதபுரம் மாவட்ட அளவில் பெரும் பரப்பையும், அதிர்ச்சியையும் ஏற்படுத்தியுள்ளது.

செய்தியாளர் -மா மு ஜெயக்குமார் / பரமக்குடி
நிழல் . இன் – 8939476777

Leave a Reply

Your email address will not be published. Required fields are marked *

You may have missed