Monthly Archives: January 2013

28_Kovai_Nizhal_Shortfilm_Workshop

நிழல் 28 குறும்ப்பட பயிற்சிப்பட்டறை வெற்றிகரமாக நடந்து முடிந்துள்ளது
நாள் 23 – 28 பிப்பரவரி 2013 இடம் : கோவை, திருநாவுக்கரசு 9444484868
Nizhal 28th shortfilm workshop sucessfully completed
Date : 23 – 28 February 2013, Place: Coimbatore, Thirunavukkarasu 9444484868

[flagallery gid=26 name=”28_Chettipalayam”].

[flagallery gid=25 name=”28_kovai_Chettipalayam”].

nizhal workshop shortfilms taken by nizhal students in 28th nizhal pathiyam shortfilm workshop… these are training shortfilms..

நிழல்-பதியம் இணைந்து நடத்திய 28வது குறும்பட பயிற்சி பட்டறை கோயம்புத்தூர் செட்டிப்பாளையம் சி.டி.பவுண்டேசனில் வெற்றிகரமாக நடந்து முடிந்துள்ளது. 66 மாணவர்கள் தமிழகத்தின் பல்வேறு பகுதிகளிலிருந்து கலந்து கொண்டனர். அதில் பெங்களூரை சேர்ந்த தமிழர் ஒருவரும் தமிழீழ மண்ணிலிருந்து தமிழன் ஒருவரும் கலந்து கொண்டது இந்த பட்டறையின் பல சிறப்புகளில் இதுவும் ஒன்று.
கோவையிலிருந்து தான் குறும்பட பயிற்சி பட்டறை துவங்கியது. தமிழகத்தின் 27 மாவட்டங்களில் கடந்த பத்தாண்டுகள் சுற்றிவிட்டு மீண்டும் கோவையிலிருந்தே தனது பயணத்தை துவங்கியிருக்கிறது.
பட்டறை நடந்த இடம் சி.டி.பவுண்டேசன். இது ஒரு ஜைனருடைய தாஜ்மஹால் என்று சொல்லலாம். மறைந்த தன் மனைவிக்காக எழுப்பிய நினைவு மண்டபம். நில மட்டத்திலிருந்து 15 அடி கீழே இரண்டு சதுரமான மிகப்பெரிய பிரமீடு வடிவ கோபுரங்களை உடையது. இரண்டு மண்டபத்திலிருந்து வெளிவந்து மேலேறினால் இத்தாலிய கொலோசியத்தின் அரை வட்டம் போன்ற கேலரியும் நாடக மேடையும் பார்ப்பவர் மனதை பரவசப்படுத்தும். அரங்கத்தைச் சுற்றி அமைக்கப்பட்டுள்ள தோட்டங்களும் செய்குளங்களும் ஜென்-பெளத்திச பாணியில் உருவாக்கப்பட்டிருந்தது. வாயில்களும் மாடங்களும் பின்நவீனத்துவ பாணியில் செய்யப்பட்டிருந்தது. இந்த இடத்தை கோவை வாசிகளே பார்த்ததில்லை என்று பலரும் தெரிவித்தனர்.
வாசன் அவர்கள் வரவேற்புரையை ஆற்ற முருகவேள் தலைமை ஏற்க பாமரனும் செளந்தரும் வாழ்த்த பட்டறை இனிதே துவங்கியது. குறும்படம் ஆவணப்படம் பற்றி திருநாவுக்கரசும், நடிப்பு பயிற்சியை சுரேஷ்வரனும் தம்பிச்சோழனும், ஒப்பனை பற்றி ரகுமானும் கேமரா கையாளுதல் பற்றி பன்.இறையும்,திரைக்கதை எழுதுவது பற்றி இயக்குனர் பாலுமணிவண்ணனும், படத்தொகுப்பு பயிற்சியை படத்தொகுப்பாளர்கள் அருண் துரைராஜ் மற்றும் நிழல் படத்தொகுப்பு நிலையத்தின் பயிற்றுனர் ஜீவா மணிகண்டன் அவர்களும் பயிற்சி அளித்தனர். திரைப்பட திறனாய்வை ஆனந்த் மற்றும் கனல் மைந்தன் ஆகியோர் செய்தனர்.
மாணவர்களின் அனுபவ பகிர்விற்குப்பிறகு ”மதுபானக்கடை” இயக்குனர் கமலக்கண்ணன் மாணவர்களுடன் கலந்துரையாடினார். குழு புகைப்படம் எடுக்கப்படம் எடுக்கப்பட்டது. பின்னர் அனைவருக்கும் சான்றிதழ் வழங்கும் நிகழ்வுக்குப் பின்னர் ’நாளி’ லட்சுமணன் நன்றியுரையாற்ற வெற்றிகரமாக பயிற்சி பட்டறை நிறைவுற்றது.

அனுபவ பகிர்வு….

”நிழலில்” இளைப்பாறிய சில நாட்கள்
– எஸ். செளந்தரராஜன், கோவை.
திரைப்படங்களின் மீது தணியாத தாகம் எனக்கு. பால்யம் முதல் இன்றுவரை அதன் ஆச்சர்யங்களிலிருந்து என்னால் மீளவே முடியாததே அதன் வலிமைக்கு சாட்சி. நான் மட்டுமல்ல என்னைப் போலவேதான் நீங்களும் என்பதை நான் நன்கறிவேன். எல்லாக் கலைகளுக்கும் இந்த மன ஈர்ப்பு சக்தி இருப்பினும்…. திரைப்படக்கலைக்கு இந்த ஈர்ப்பு சக்தியும் வலிமையும் மிக அழுத்தமாகவும் அதிகமாகவும் உண்டு என்பதை உலகறியும்.
திரைப்படத்தை முறையாக பயிலவேண்டும் என்ற ஆவல் எனக்கு வெகு காலமாக உண்டு.
காலம் கடந்தாலும்…அந்த நெருப்பு எனக்குள் கனன்று கொண்டே இருந்தது. காலம்தான் யாரிடம் எதனைக் கொண்டுபோய் எப்போது சேர்ப்பது என்பதைத் தீர்மானிக்கிறது.
சூழலும் வாய்ப்பும் வாய்க்காமலேயே 44 வயதைக் கடந்துவிட்ட எனக்கு முகநூல் வழியாக வந்ததொரு வாய்ப்பு…..
“ நிழல்-பதியம்” 28-ஆவது குறும்படப் பயிற்சிப் பட்டறை”
கோவையில் மிக ரம்யமான தனிமைச் சூழலில் அமைதியும் அழகும் மெளனமொழி பேசும் C.D.FOUNDATION-ல் நடந்தது.
2013 பிப்ரவரி 23 முதல் 28 வரை…6 நாட்களும் என் வாழ்வில் மறக்கமுடியாத அனுபவங்களைத் தந்த நாட்கள்.
100 மணி நேரத்தில் சினிமா பற்றிய முழு தகவல்களையும் பயிற்சியையும் தந்துவிட முடியுமா என சந்தேகத்துடனும் … இது ”ரியல்” அல்ல ”ரீல்” என்ற அவநம்பிக்கையுடனும் சென்ற எனக்கு, என் அவநம்பிக்கையைப் பொய்யாக்கி, அது சாத்தியமே என்பதை மெய்ப்பித்துக் காட்டியது திரு. ’நிழல்” திருநாவுக்கரசு அவர்களின் பாடத்திட்டமும்,பயிற்சி முறையும். பயிற்சியாளர்களும்…. இது ஒரு ஆச்சர்யம்தான்.
.
ஒப்பனைமுதல்….. படத்தொகுப்பு வரை……. ஒர் குறும்படத்திற்கு மட்டுமல்ல ஒரு திரைப்படத்திற்கே தேவையான அனைத்தையும் ஒருங்கினைந்த பாடத்திட்டமாக அமைத்திருந்த விதம் அருமை. பயனுள்ளது. ஒவ்வொன்றும் பயிற்சியுடன் இணைந்திருந்ததால்…. பழகிப் பயின்றவிதம் எனக்கு மிகவும் பிடித்திருந்தது. நானே ஒரு மாணவனாய் மாறிப்போனேன் ஒரு குழந்தையைப் போல.
நிகழ்ச்சியை முதல்நாள் தொடங்கி வைத்த ”பதியம்” பாரதிவாசன் முதல், நிகழ்ச்சியை நிறைவு நாள் சிறப்புரை செய்து சான்றிதழ் வழங்கிய “மதுபானக்கடை” இயக்குனர் கமலக்கண்ணன் வரை….. வழங்கிய உரைகளும்…அனுபவ அறிவும் ….பகிர்ந்து கொண்ட செய்திகளும்… நவீன சினிமா குறித்த புரிதலை தெளிவு படுத்தின.
சினிமா தொழில் நுட்பத்தை பயில்வதையும் தாண்டி , சினிமாவை எப்படி அணுகுவது என்பதை, ரசனையை, திரைமொழியைப் புரிந்து கொள்ளும் விதத்தை, நவீன சினிமா உத்திகள் ஆகியவற்றை நன்கு கற்க முடிந்தது சிறப்பாய் இருந்தது.
வாழ்த்துரை வழங்கிய திரு.பாமரன், எரியும் பனிக்காடு (Red Tea) நாவல் மொழிபெயர்ப்பாளர் திரு.முருகவேள், திரு.செளந்தர் ஆகியோரின் உரை அர்த்த செறிவு மிக்கதாய் இருந்தது.
நடிப்பு பயிற்சி தந்து நடிப்பையே விளையாட்டாய் பயிற்றுவித்த கூத்துப்பட்டறை திரு.சுரேஷ்வரனையும், மதியம்…கருவாகி ..உருவாகி… குழந்தையாகி ஆணாக இருந்தாலும் எனக்கும் ஒரு பிரசவ அனுபவத்தைதயும் பட்டாம்பூச்சியாய் எனை உருமாற்றி உணரச்செய்த திரு.தம்பிசோழனையும் என்னால் மறக்கவே முடியாது. நானே நடித்தது எனக்கு புது அனுபவம்தான்.
வினோதினியின் தந்தையாய் நான் உருமாறியது எனக்கு ஆச்சர்யம்தான். நமக்குள்ள ஆற்றலை நம்மை அறியாமலே வெளிக்கொணர்ந்த விதம் அழகு.
ஒப்பனை பயிற்சி தந்த சாதனை சிகரம் திரு.ரகுமான் ஒரு தோழமை நெஞ்சம். Special effects, சினிமா மேக்கப், ஒப்பனை சாதனங்களின் விலைமுதல் விற்கும் இடம், வித்தை வரை விளக்கிய விதம் அருமை. நான் என் கைப்பட இன்னொருவருக்கு ஒப்பனை செய்தது வித்தியாசமான அனுபவ்ம்தான்.
கேமரா, கோணம், வெளிச்சம்…. ஆகியவற்றை மிக அழகாக விளக்கிய திரு. பன்.இறை அவர்கள் நினைவுகூறத்தக்கவர்.
Forms of Photography, Rim Light Photography, Rule of Third ஆகியன பற்றி மிக அழகாகவும், செய்முறை விளக்கமும் தந்தது நல்ல அனுபவம்.
இலக்கியத்தில் நல்ல பரிச்சயமும் படைப்பாற்றலும் உள்ள நான்.. இதுவரை பலமுறை திரைக்கதை எழுத முயற்சி செய்து தோல்வியுற்றிருக்கிறேன். பல முறை பாதியிலேயே மனம் சோர்ந்து முயற்சியைக் கைவிட்டிருக்கிறேன். ஆனால் இயக்குனர் திரு. பாலுமணிவண்ணன் அவர்களின் ஊக்கம் தரும் உரையாலும், திரைக்கதை உத்தி பற்றி பாடம் நடத்திய விதத்தாலும், ஒரு திரைக்கதை ஆசிரியன் தனது கொள்கையை விட்டுக் கொடுக்காமல் வாழவேண்டும் என்ற நேர்மையினாலும் நெஞ்சில் நிற்கிறார். திரைக்கதைப் பயிற்சி மனதில் நிற்கிறது.
அன்று மதியம் நடைபெற்ற மின்சார வெட்டை மையமாக வைத்து நடத்தப்பட்ட 2 மணி நேர திரைக்கதை தேர்வு எனக்கு மிகவும் பிடித்திருந்தது. பயன்மிக்கதாயிருந்தது. ஆச்சர்யப்படத் தக்க வகையில் நான் ஒரு முழு திரைக்கதை எழுதி முடித்திருந்தேன்.
படத்தொகுப்பு பற்றி திரு. அருண்துரைராஜ் மிக எளிமையான முறையில் கேள்வி பதில் முறையில் விளக்கினார். அவரின் அனுபவத்தையும் சேர்த்து பயிற்சி பெற வந்தவர்களின் ஒவ்வொரு கேள்விக்கும் மிக பொறுமையாகவும் அமைதியாகவும் பதில் தந்து நன்கு விளக்கினார்.
மாலையில் திரு. ஜீவா மணிகண்டன் (மணிஜீவா) அவர்களின் படத்தொகுப்பு வகுப்பு மிக விரிவாகவும் வெகு அற்புதமாகவும் இருந்தது. படத்தொகுப்பின் வகைகள், முறைகள், Basic Rules of Editing, Editing softwares, Types of cuts, Optical effects ஆகியவற்றினை மிக அழுத்தமாக விளக்கினார். இதற்கிடையில் நாங்கள் ஒரு குழுவாக இணைந்து ஒரு குறும்படம் தயாரித்திருந்தோம். இவரே எங்கள் குழு எடுத்த குறும்படத்தினை practical-ஆக Editing செய்து விளக்கினார்.
ஒவ்வொரு நாளும் திரு.”நிழல்” திருநாவுக்கரசு அவர்கள் அன்றைய பாடம் பற்றிய வரலாற்றையும், இலக்கணத்தையும், அதன் பின்னனி பற்றியும், நவீன சினிமா குறித்தும் தினமும் வகுப்பெடுத்தார். அது மிகவும் பயனுள்ளதாகவும் இருந்தது. அவரே குறும்படம், அதன் வகைகள் பற்றியும், ஆங்கிலப் படங்கள் திரையிட்டு காட்டியும் விளக்கியும் வந்தார். இது எங்கள் எல்லோருக்குமே ஒரு புதிய பார்வையைத் தந்தது. அதே நாளில் ”கோணங்கள்” திரு. ஆனந்த் அவர்களின் உரையும் நவீன சினிமா அறிமுகமும் நாம் வளர வேண்டிய பாதையையும் பயணப்பட வேண்டிய இலக்கையும் தெளிவுபடுத்தியது.
பட்டறையின் கடைசி நாளன்று… திரு.கனல் மைந்தன் அவர்களின் உரை மிக ஆழமாக இருந்தது. வரலாற்றுப் பார்வையை முன் வைத்தது.
”மதுபானக்கடை” இயக்குனர் திரு. கமலக்கண்ணன் அவர்களின் உரையும், மாணவர்களின் கேள்விக்கு பதிலளித்த விதமும், தனது பட அனுபவம் குறித்த பகிர்வுகளும் அருமையாகவும் அழகாகவும் பயனோடும் இருந்தன.
பின்னர், மாணவர்களின் அனுபவப் பகிர்வு நடைபெற்ற போது ஒவ்வொருவரும் உணர்ச்சிபொங்கவும், உள்ளத்தில் உள்ளது அனைத்தையும் கொட்டிவிடத் தவித்த தவிப்பும் அற்புதமாக வெளிப்பட்டது.
அதன் பின்னர்…. ”மதுபானக்கடை” இயக்குனர் திரு. கமலக்கண்ணன் சான்றிதழ் வழங்கினார். பதியம் திரு. பாரதிவாசன், திரு. ”நிழல்” திருநாவுக்கரசு அவர்களும் இணைந்து வழங்கினர்.
திரு. ”நாளி”லட்சுமணன் நன்றி கூற பயிற்சி அரங்கம் இனிதே நிறைவுற்றது.
தனித்தனியே வந்தோம்… வயது வித்தியாசம் இன்றி நண்பர்களோனோம்… ஒரே இடத்தில் தங்கி, உண்டு, உறங்கி… ஆறு நாட்களில் ஐக்கியமானோம் ஒரு குடும்பமாய்.
இறுதி நாளன்று விடைபெற்று பிரிந்தபோது…. ஒவ்வொருவரின் கண்களின் ஓரங்களிலும் கண்ணீர் துளி. ”மச்சான் நாம சாதிப்போம்டா என்ற சூளுரை” என்று கனத்த மனதுடன் பிரிந்தோம்.
”நிழல்”-பதியம் 28 ஆவது குறும்படப் பயிற்சிப் பட்டறையில் நானும் மாணவனாய் கற்றது என் வாழ்வில் மறக்க இயலாத அனுபவம்..
மாறா அன்புடனும் நன்றியுடனும் எஸ்.செளந்தரராஜன்.
கோவை-5

World Class Cinema Not In Tamil

உலகத் தரத்திற்கான சினிமா கோலிவுட்டில் இல்லை
& ‘நிழல்’ திருநாவுக்கரசு

”உலக சினிமா” ”உலக சினிமா” என்கிற சப்தம் தமிழ் திரை அரங்கில் அடிக்கடி கேட்கக்கூடிய வார்த்தையாக இருக்கிறது. உலக சினிமா என்ற ஒன்று இருக்கிறதா? என்று நம்மை நாமே கேட்டுக் கொண்டால் பல பதில்கள் கிடைக்கின்றன. சினிமாவின் மொழி ஒன்றுதான் பல அல்ல, அதனால் படித்தவருக்கும் பாமரருக்கும் தனக்கான மொழியாக சினிமா தேர்ந்தெடுத்துக் கொண்டது. கேமராவையும் எடிட்டிங்கையும்தான் இதன் மூலமாகவே சினிமா மக்களை எதிர்கொண்டது. இது உலகத்துக்குப் பொதுவான ஒன்று.

உலக சினிமா என்று பொதுவான ஒன்று இருக்கிறதா? இல்லை; ஒவ்வொரு நாட்டுக்கும் தனித்தன்மையுள்ள தேசிய அடையாளங்களுடன் கூடிய சினிமாவைத்தான் தனித்தன்மையானது என்கிறோம். இதுவே பின்னர் உலக மக்களுக்கு அற்பணிக்கப்படுகிறது. திரைப்பட விழாக்கள் மூலம், அதன் பின்னர் அப்படம் உலக சினிமா அந்தஸ்தைப் பெற்று விடுகிறது. வேறு எதுதான் உலக சினிமா? ஹாலிவுட் பெரும் பொருட்செலவில் தயாரித்து ஆங்கில மொழிவாயிலாகவே முன்பு உலகம் முழுவதுமே திரையிட்டு வந்தது. தற்போது அந்தந்த நாட்டு மொழிகளில் மொழி பெயர்த்து (டப் செய்து) வெளியிட்டு முன்பை விட இன்னும் அதிக வசூலை அள்ளுகிறது. இந்த முறை புரூஸ்லீ படங்களை விட ஜாக்கிச்சான் படங்களுக்குப் பொருந்தும்.

ஹாலிவுட் பெரும் பொருட்செலவில் ஆடம்பரமாகவும் பிரம்மாண்டமாகவும் படங்களைத் தயாரித்து மக்களை சிந்திக்க விடாமல் செய்வதில் தனது கெட்டிக்காரத் தனத்தைக்காட்டுகிறது. ஒரு காலத்தில் உள்நாட்டுப் படம் தயாரிப்பதற்கு பெரும் முட்டுக்கட்டையாக இருந்தது.

சினிமாவுக்கு பல்வேறு தொழில்நுட்பங்களையும் கோட்பாடுகளையும் ஐரோப்பிய நாடுகளான பிரான்ஸ், ஜெர்மனி, இத்தாலி, ரஷ்யா முதலிய நாடுகள் தனித்துள்ளன, ஆனால் வியாபார நாட்டாண்மை ஹாலிவுட்டிடம் இருப்பதால் என்றைக்குமே ஐரோப்பாவுக்கும்&ஹாலிவுட்டுக்கும் தீராத முரண் இருந்து வருகிறது. இன்றைக்கு உலகத்தின் வேறு, வேறு பகுதிகளில் இருக்கக்கூடிய நாடுகளான ஈரான், சீனா, கொரியா, ப்ரேசில் நாட்டுப்படங்கள் உலகப்பட விழாவில் முதன்மையான இடத்தை வகிக்கின்றன.

தமிழ்ப்படங்கள் 1916முதல் இன்று வரை 5000திற்கும் மேற்பட்ட படங்கள் எடுத்திருந்தாலும் ஒன்று கூட உலகப்படங்களுக்கான விருதினை தங்கப்பனை(பிரான்ஸ்) தங்கசிங்கம்(ஜெர்மனி), தங்க சிங்கம் (இத்தாலி) விருதினை பெற்றதில்லை. நாம் எடுத்துள்ளவை சினிமாவா? நாடகமா? என்கிற கேள்வியினை இன்று பலரும் கேட்கத் தொடங்கி விட்டனர். சினிமாவுக்குத் தேவையற்ற பாடல்கள், ஆடல்கள், காமெடி டிராக் போன்றவை என்றைக்கும் நம்மை உலகப்பட வரிசையில் நிற்க வைக்காது என்பது மட்டும் நிதர்சனமாகத் தெரிகிறது.

ஒரே விதமான கதை சொல்லல் முறை மூலம் பார்வையாளருக்கு மிகச்சீக்கிரத்தில் அலுப்புத்தட்டி விடுகிறது. ”ஹீரோ ஓரியண்டல்” கதை மீண்டும் வெறுப்பை ஏற்படுத்துகிறது. சம்பந்தமே இல்லாத வெளிநாட்டுக்காட்சிகள், பாடல்கள் யதார்த்தமே இல்லாத காட்சியமைப்புகளும் உரையாடல்களும் கசந்து போன பார்வையாளன் இன்று உலகப்படங்களை பார்க்க வைக்கிறது. பத்தாண்டுகள்ளுக்கு முன்னால் வெளிநாட்டுப் படங்களைப் பார்க்க வேண்டுமானால் பிலிம் கிளப் உறுப்பினராக இருந்தால்தான் முடியும் ஆனால் இன்றோ 30ரூபாய்க்கு உலகப்படங்கள் சந்தையில் கூவிக்கூவி விற்கப்படுகிறது. வசதி படைத்தவர்கள் இணையத்தில் பதிவிறக்கம் செய்து பார்க்கின்றனர். தொடந்து வெளிநாட்டுப்படங்களை பார்க்கும் ரசிகன் யதார்த்தமான பொருளில் உண்மையான சினிமாவை பார்ப்பதால் தமிழ்ப்படம் பார்க்கும் விருப்பமே போய் விடுகிறது. ”தான் இவ்வளவு காலம் பார்த்தது என்ன?” என்கிற கேள்வி வந்து உள் மனதில் தலையெழுப்புகிறது.

இதைப்பற்றியெல்லாம் கவலைப்படாத இயக்குநர்கள், தயாரிப்பாளரிடம் பேசும்போது உலகப்பட அளவில் தயாரிப்புக்கான செலவை பெறுவதற்கு திட்டம் போடுகின்றனர். உலகப்படங்களை இயக்குநர் பார்த்தால் அதன் ருசியே தனிதான். எந்த நாட்டுப் படமாக இருந்தாலும் நம் இயக்குநர் கண்பட்டால் போதும் அது அவரது சரக்காகி விடும். மூளையைக்கசக்கி பிழிந்து உருவாக்கியது என்பார் நாமும் பார்க்க வேண்டியதுதான்.

இன்று சில தமிழ்ப்பட இயக்குநர்கள் எனது படமும் கேனில் கலந்து கொண்டது என்று புருடா விட ஆரம்பித்துள்ளனர். கேனில் படம் திரையிடுவத்ற்கான பணத்தைக் கட்டினால் அந்த நகரத்தில் தெருக்களில் திரையிடலாம். அதைப் பயன்படுத்திக்கொண்டு இங்கு வந்து எனது படங்களும் போட்டியில் கலந்து கொண்டு விட்டது என்று செய்தியாளர்களிடம் தைரியமாக கதை அளக்கின்றனர்.

பல்வேறு மொழிகள், இனங்கள், நாடுகள் இவை எல்லாவற்றையும் இணைக்கும் உலக சினிமா தமிழ் சினிமாவை எப்போது இணைக்கும் என்பதுதான் எங்கள் சுப்பன் கேட்கும் கேள்வி.

36th Book Fair

36வது புத்தக கண்காட்சியில் நிழல்… 36th Book Fair from 11-23 Jan’2013
நந்தனம் கலைக் கல்லூரி, தெனாம்பெட்டை… Nandhanam Arts College, Teynampet
கடை எண : 321, முன்றில், கே எ அப்பாஸ் வழியில்… Shop No.321 Munril, K A Abbas Way…

[flagallery gid=24 name=”36bookfair_photos”]

Book reviews by other magazines….


நிழல் வெளியிடுகள்:
1. சினிமா:சட்டகமும் சாளரமும் – ஈ. சுவர்ணவேல் ரூ 175/-

2. கமலின் க(லை)லப்படங்கள் – பி ஆர் மகாதேவன் ரூ 120/-

3. தமிழிசைத் தவமணி ; மதுரை மாரியப்ப சாமிகள் வரலாறு – ப சோழநாடன் ரூ 150/-

4. பொலிவிய நாட்குறிப்பு – சே குவேரா – தமிழில் அமரந்தா..

5. சினிமா ரசனை – அம்ஷன் குமார் ரூ 275/-

6. சந்திர பாபு – சுவர்ணராஜ் ரூ 350/-

alfred_hitchcock

இயக்குனர்களின் இயக்குனர் ஆல்பர்ட் ஹிட்ச்காக்.

– ’நிழல்’ ப. திருநாவுக்கரசு..,

இங்கிலாந்து ராணியாக இருந்தாலும் அமெரிக்க ஜனாதிபதியாக இருந்தாலும் படம் ஆரம்பித்த பிறகு யாரையும் திரையரங்கினுள் அனுமதிக்கக் கூடாது என்று கட்டளை போட்ட இயக்குனர் உலகமே திகில் மன்னன் என்றழைத்த ஆல்பர்ட் ஹிட்ச்காக்.

இங்கிலாந்தில் உள்ள லேண்டோன் என்ற ஊரில் 1899 ஆம் ஆண்டு ஆக 13 ஆம் தேதியன்று பிறந்தார். தன் 21 ஆம் வயதில் மெளனப் படங்களுக்கு டைட்டில் எழுதும் வேலையில் சேர்ந்து உதவி இயக்குனராக்கி பி இயக்குனரானார். தன்னுடன் பணியாற்றிய அல்மரா வில்லியை மணந்தார். 1922 தொடங்கி 1976 வரை 66 படங்களை எடுத்தார்.

ஹிட்ச்காக்கின் தத்துவம்

இவரது அனைத்துப் படங்களுக்கும் ஜீவநாடியாக இருந்த மர்மம் மற்றும் திகிலைத் தனது திரைப்படக் கொள்கையாக அறிவித்திருந்தார். திரைப்படம் என்ன சொல்ல வருகிறது என்பதைப் பற்றிய எனக்கு கவலை இல்லை. பார்வையாளர்களை அலறவைக்கும் உத்தி பற்றித்தான் எனக்கு அக்கறை. ஒரு படம் நேர்த்தியாக அளிக்கப்பட்டதன் மூலம் பார்வையாளர்கள் ஜப்பானில் இருந்தாலும் சரி. இந்தியாவில் இருந்தாலும் சரி அவர்கள் ஒரு விதமாக திகிலுற வேண்டும். என்று தனது பேட்டியில் கூறியுள்ளார்.

இவர் படங்கள் அனைத்தும் ஒரு கொலையோ அல்லது ஒரு திகில் சம்பவமோ நடப்பதற்கு முன்னும் பின்னும் நிகழ்பவைகளை மையமாகக் கொண்டிருக்கும். நாவல்கள் சஸ்பென்ஸைக் கடைசி வரைக்கும் இழுத்துக்கொண்டு போகலாம். சினிமாவில் பார்வையாளர்களை நான் அப்படி ஏமாற்ற விரும்பவில்லை. முதலிலேயே அதைக்காண்பித்து விடுவேன். பிறகு அந்தக்கொலை எப்படி நடந்தது ? நாயகன் அல்லது நாயகி எப்படித் தப்பித்தனர் என்பது பற்றி மீதிப்படம் இருக்கும் என்று தன்னுடைய படங்கள் பற்றிக் கூறியுள்ளார். ஒரு நாவலையோ சிறுகதையோ நாடகத்தையோ தான் திரைப்படமாக எடுத்தார். பிற இயக்குனர்களைப் போலத் தானே கதை பண்ணும் வேலையைச் செய்த்தில்லை.

1925 தொடங்கி 40வரை இங்கிலாந்தில் இருந்து படங்களை இயக்கினார். தொடக்க காலப்படங்களான பிளஷர் கார்டன், த மவுண்டன் ஈகிள், தி லாட்ஜர், டவுன்ஷிப், ஈஸி வர்ட்சு, த ரிங், த பார்மல் வைப், ஷாம்பெய்ன், திமான்க்ஸ் மேன் ஆகிய படங்கள் திகிலற்ற மெலோ ட்ராமா மெளனப்படங்களாக இருந்தன.

]திரைமொழி

ஹிட்ச்காக் பணியாற்றிய ஜெர்மன் கம்பெனிக்காக ஜெர்மனியில் இருந்தபோது அந்நாட்டின் திரைமேதைகளான முர்நாங், பிரிட்ஜ்லாங், எரிக் பொம்மர், போன்றோருடன் பணியாற்றியபோது தான் திரைமொழியான பார்வை ஊடகமொழியை தான் புரிந்துகொண்ட்தாக பல சந்தர்ப்பங்களில் தெரிவித்துள்ளார். அமெரிக்கப் படங்களில் காணப்படும் வழவழா உரையாடல் இவர் படங்களில் இருக்காது. பல நேரங்களில் உரையாடல் இல்லாமலே படம் எடுப்பதற்கு ஜெர்மானிய அனுபவம் உதவியிருப்பதை அவரது படங்களில் காணலாம். அத்துடன் அவருடையவை திகில்ப்படங்கள் என்பதால் உரையாடலுக்கானத் தேவையும் இருக்காது. அவரது மெளனப்படங்களிலும் அதிகம் திரைமொழியையே பயன்படுத்தியிருப்பார்.
திகில் படங்களுக்கான ஒலி, ஒளி, இசை எடிட்டிங் போன்றவற்றை நேர்த்தியான விகிதங்களில் கலந்து கொடுத்ததால் தான் இன்றளவும் பேசப்படுகிறார். ஹிட்ச்காக். திகிலை உண்டாக்குவதில் எடிட்டிங் முக்கிய பங்காற்றுகிறது. பட்த்தின் தன்மைக்கு ஏற்ப வேகமாகவோ மெதுவாகவோ காட்சியைத் திரைப்படுத்துவதால் பார்வையாளர் மனதில் திகிலை உருவாக்க முடியும் என்பதை ரஷ்யாவின் புரட்சி இயக்குனர் செர்ஜி ஐஸன்ஸ்டீனின் எடிட்டிங் உத்தியான இண்டலக்சுவல் எடிட்டிங் முறையினால் பார்வையாளரை நாற்காலியின் முனைக்குக் கொண்டு வந்து விடுவார். இதுவே இவரது வெற்றிக்குக் காரணம் என்று விமர்சகர்களை கூறுகின்றார்.

படங்களின் மத்தியில் தோன்றுதல்

திகில் படங்களுக்கு மக்களிடம் நல்ல வரவேற்பு இருப்பதை உணர்ந்து கொண்ட ஹிட்ச்காக் தனது படங்களில் இடையில் தோன்றுவதைக் கடைசி வரையில் கடைப்பிடித்தார். இதைக் கவனிப்பதற்குப் பெரும் ரசிகர் கூட்டம் உருவாகி விட்டது. இதன் மூலமாக பார்வையாளர்களின் கவனம் சிதறுவதை பின்னர் உணர்ந்த ஹிட்ச்காக் படத்தின் துவக்கத்திலேயே அடையாளப்படுத்த முடியாதபடி அல்லது கூட்டத்தின் கூட்டமாக வந்து போகிற வழக்கத்தை வைத்துக்கொண்டார்.

லைப்போட் 1943 என்ற படத்தில் கப்பல் உடைந்த முக்கிய கதாபாத்திரங்கள் மட்டுமே பிழைத்திருக்கும் நேரத்தில் ஹிட்ச்காக் எப்படித் தோன்றுவார் என்று பார்வையாளர்களிடையே ஒரு (ஆர்வக்) குறுகுறுப்பு தொற்றிய நிலையில் கப்பலில் கிடைக்கும் செய்தித்தாளில் தொப்பை குறைக்கும் விளம்பரத்திற்கு போஸ் கொடுத்து ரசிகர்களுக்குப் பெரும் மகிழ்ச்சியை உண்டாக்கினார். உலக அளவில் சார்லி சாப்ளினுக்குப் பிறகு ஹிட்ச்காக் தான் பெரிய ரசிகர் கூட்டத்தைப் பெற்றிருந்தார்.

திரைப்படமேதை

பிரான்சில் புதிய அலை உருவாகியிருந்த நேரம் க கியே து சினிமா என்ற சினிமா இதழின் ஆசிரியராக இருந்த ஆந்த்ரே பாஸன் ஒரு படத்திற்கு இயக்குனர்தான் முழுப்பொறுப்பு என்ற Author Theory யை உருவாக்கினார். அதற்கு ஹிட்ச்காக் முற்றிலும் பொருத்தமானவராக இருந்தால் புதிய அலை இயக்குனராக பிரான்சுவா த்ரூபோவ் ஹிட்ச்காக்கைப் பலநாட்கள் பேட்டிக்கண்டு அதை புத்தகமாக்கினார். இந்தப் புத்தகத்தின் மூலம் ஹிட்ச்காக் வெறும் திகில் மன்னன் மட்டுமல்ல ஒரு மேதையும் தான் என்பதை உலகம் ஒப்புக் கொண்டது.
ஹிட்ச்காக் படத்தின் புதிய திரைநுட்பங்கள்
ஹிட்ச்காக் சிறந்த ஓவியராகவும் இருந்ததால் செவ்வகச் சட்டகத்தை எவ்வாறு சிறந்த முறையில் கட்டமைப்பது என்பதிலும் புதிய உத்தியை அறிமுகப்படுத்தினார். இவரது காட்சியமைப்பைத் திரையில் ஒரு முறைப் பார்த்தால் போதும் வாழ்நாள் எல்லாம் மறக்கவே முடியாது. சைக்கோவில் வரும் வீடு, நார்த் பை வெஸ்ட் வரும் விமானத் துரத்தல், பேட்ஸில் வரும் துரத்தல் போன்றவை என்றும் அழியாத ஓவியங்கள்.

இங்கிலாந்தில் பிளாக் மெயில் ஐ மெளனப் படமாக எடுத்த நேரத்தில் திரைப்படங்கள் பேச ஆரம்பித்துவிட்டன. உடனே ஹிட்ச்காக் தனது படங்களையும் பேச வைத்தார் அத்துடன் அப்படத்தில் நடித்த ஒரு நடிகருக்கு டப்பிங் குரல் கொடுத்து புதுமையை புகுத்தினார். இதேபோல 39 ஸ்டெப்ஸ் படத்தில் சுத்தம் செய்யும் வேலைக்காரி கொலை செய்யப்பட்டுக்கிடப்பதை பார்த்து அலற அந்த ஓசையை ரயில் சத்தத்துடன் இணைத்து ரயிலில் கொலையாளி இருப்பதைக்காட்டி ஒலிக்கலவையில் எடிட்டிங் புதுமையை புகுத்தினார்.
அதேபோல் நொட்டோரியஸ் படத்தில் கேமரா கிரேன் மூலமாக தூரக்காட்சியிலிருந்து படிப்படியாக மாடியிலிருந்து கீழ் இறங்கி ஹாலுக்குள் நுழைந்து குளோசப்பில் காதாநாயகின் கையில் உள்ள சாவியைக் காண்பிக்கும். இந்த கிரேன் சாட் காட்சியை உலகசினிமா ரசிகர்கள் மறக்கமாட்டார்கள்.

அவது முதல் வண்ண படம் ரோப் (1948) இதிலும் ஒரு புதுமை பட்த்தில் கட்டே கிடையாது. ஒரு காட்சியிலிருந்து அடுத்த காட்சிக்கு செல்ல லைவ் ஃபேட் இன், ஃபேட் அவுட், டிசால்வ் முதலியவற்றை பயன்படுத்தினார். பட்த்தின் முழுக்கதையும் ஒரே ஹாலில் நடப்பதால் கட் தெரியாமல் படமாக்கியிருந்தார். காமிராவில் ஒரு கேன் முடிந்த்தும் அந்த ஷாட் ஒருவர் முதுகிலோ அல்லது ஒரு பொருளிலோ முடியும் மீண்டும் கேன் பொருத்தப்பட்டு பழைய கேன் முடிந்த இட்த்திலிருந்து ஷாட் ஆரம்பிக்கும். இந்த முறையை உலகமே வியந்து பார்த்த்து. ஸ்ட்ரேஞ்சர் ஆன் ட்ரெய்ன் படத்தில் ஒரு கொலை நடக்கிறது. அதை நேரடியாக்க் காட்டாமல் கொலையாளி பெண்ணின் கழுத்தில் கை வைக்க அப்பெண்ணின் முகத்தில் இருந்த கூலிங் கிளாஸ் கீழே விழுகிறது .

இப்படியாக கொலைக்காட்சிக்காட்டப்பட்டது. இந்த காட்சியை பலத்தமிழ் படங்களில் காப்பி அடித்தனர். நொட்டோரியஸ் படத்தில் ஒரு முத்தக்காட்சி . அமெரிக்கத்தணிக்கை குழு முத்தக்காட்சி மூன்று நிமிடங்களுக்கு மேல் நீடிக்கக்கூடாது என்று கட்டுப்பாடு விதித்தது அதை மீறுவதென்று முடிவு செய்த ஹிட்ச்காக் முத்தத்தைக் காண்பித்துவிட்டு காப்பி பருகுவதை காட்டுவதன் மூலம் முத்தம் தொடர்கிறது என்று பார்வையாளர்களை உணரச்செய்தார்.
பொதுவாக திகில் காட்சிகளை இரவுச்சூழலில் எடுத்தால் தான் பார்வையாளரிடம் அச்சத்தை உருவாக்க முடியும். ஆனால் ஹிட்ச்காக் பட்டப்பகல் பணிரெண்டு மணிக்கு கொளுத்தும் வெயிலில் படமாக்கி அதிசயிக்க வைத்தார். நார்த் நார்த் பை வெஸ்ட் என்ற படத்தில் ஏழு நிமிடங்கள் இடம் பெறும் இந்த காட்சி 134 சாட்டுகளாக எடுத்து திரையிட்டு அதிசயிக்கச்செய்தார். இதே போல் சைக்கோ படத்தில் இரண்டு கொலைச்சம்பவங்கள் வருகின்றன. முதல் கொலை ஒரு பெண் குளிக்கும் காட்சியில் 42 விநாடிகளே இடம்பெறும் இக்காட்சி 72 சாட்டுகளாக எடுக்கப்பட்டிருந்தன. அவற்றை படம் பிடிக்க ஒரு நாளானது. 67.5 அடி. படம் திரையில் ஓடும் போது பார்ப்பவர் கொலையை நேரில் பார்ப்பது போன்ற பிரம்மையை ஏற்படுத்தும் .

இதே படத்தில் அடுத்தக்காட்சி துப்பறிவாளன் மாடிக்குச் செல்கிறான். திடீரென திறக்கப்படும் கதவு வழியாக வரும் கொலையாளியால் கொல்லப்படுகிறான் . பொதுவாக படங்களில் மாடியிலிருந்து கீழ் விழுபவனை பின்புறமாகத்தான் பார்ப்போம். ஆனால் இந்தப்படத்தில் பார்வையாளரைப் பார்த்துக்கொண்டே படிகளில் சரிகிறான் துப்பறிவாளன் . மேலே கண்ட காட்சியில் ஹிட்ச்காக் எப்படி படம் பிடித்தார் தெரியுமா ?
படிக்கட்டுகளில் அகலமான பலகை வைத்து அதில் டிராலி தண்டவாளங்கள் பொருத்தப்பட்டன. கேமராவை வண்டியின் மூலம் மேலிருந்து தரை வரை முதலில் படமாக்கினார். அந்த காட்சியை பேக் ப்ரொசெக்சன் மூலமாக திரையில் விழச்செய்து திரையின் முன் நடிகனை நடிக்கவைத்து இப்போது திரையில் விழும் காட்சியையும் நடிகனின் நடிப்பையும் இன்னொரு கேமரா மூலமாக படம் பிடித்து திரையிட்டார். அந்த காட்சி வித்தியாசமாகத் தோன்றியது.

வெர்ட்டிக்கோ படத்தின் கதாநாயகனுக்கு உயரமான இடத்திலிருந்து கீழே வீழ்ந்து விடுவோமோ என்ற பயம் உண்டு . படத்தில் சில விநாடிகளே இடம்பெறும் இக்காட்சிக்காக 19000 டாலர் செலவு செய்தார் ஹிட்ச்காக் .
இரண்டு கட்டிடங்களுக்கு இடையே உள்ள அகல பாதாளத்தை காண்பிக்க கட்டிடத்தின் மேலிலிருந்து கீழ் வரை பக்கவாட்டில் டிராலி அமைத்து கேமரா கீழே விழுந்து விடாமல் ஜூம் லென்ஸை பொருத்தி கேமரா கீழிலுருந்து மேல் செல்லும் போது லென்ஸ் கீழ் நோக்கி அதன் பார்வையைச் செலுத்தும் டிராலியில் நாம் நகர்ந்த படி பின்புலத்தை சென்று அடைவது போலத் தெரியும் . ஜூம் லென்ஸில் காட்சியின் பின்புலம் நம்மை நோக்கி வருவது போல இருக்கும் இதற்கு முன்னர் யாரும் இப்படிச்செய்ததில்லை. ஆகையால் தான் ஹிட்ச்க்காக் இயக்குனர்களின் இயக்குனர் எனப்படுகிறார்.

தமிழ்சினிமாவில் ஹிட்ச்காக்கின் பாதிப்பு

டையல் பார் எம்மர்டர் என்ற படம் அப்படியே சாவி என்ற பெயரில் தமிழில் வந்தது. ஸ்ரேஞ்சர்ஸ் ஆன் அ ட்ரெயின் என்ற படத்தின் மூலக்கதையை முரண் என்ற தமிழ்படத்தில் பார்க்கலாம். த மேன் நியூ டூ மச் என்ற படத்தில் ஒரு குடும்பம் பிரிக்கப்படும் அக்குடும்பம் குடும்ப பாடல் மூலம் மீண்டும் ஒன்றிணையும். இதை முதலில் ஹிட்ச்க்காக் தான் ஆரம்பித்து வைத்தார். கைசா கைசா என்ற பாடல் கைதி கண்ணாயிரம் என்ற தமிழ் படத்தில் கொஞ்சி கொஞ்சி பேசி மதி மயக்கும் என்று வெளிவந்தது. இதே போல பிரியா படத்தில் பிரியா பாடல்.

கதாநாயகனை போலீஸ் துரத்தும் போது சாலையில் ஆட்டு மந்தை வழி மறிக்கும் இந்த காட்சியை ஹிட்ச்க்காக் முதன் முதலாக 37ஸ்டெப்ஸ் என்ற படத்தில் எடுத்தார். சுமைதாங்கி என்ற படத்தில் இந்த காட்சி வருகிறது. ஸ்பெல் பவுண்டு படத்தில் இங்கிரிட் பெர்க்மனும், கிரிகிரி பெக்கும் முத்தமிட்டுக்கொள்ளும் காட்சியில் பின்புலத்தில் 7 கதவுகள் ஒன்றன் பின் ஒன்றாக திறக்கும் பாரதிராஜாவின் நிழல்கள் படத்தில் பூங்கதவே தாழ்திறவாய் என்ற பாடல்காட்சி ஹிட்ச்காக்கையே நினைவூட்டுகிறது.

ஐ கன்பஸ் என்ற படத்தில் யார் கொலையாளி என்பது பாதிரியாருக்குத் தெரியும் ஆனால் தன்னிடம் பாவமன்னிப்புக் கேட்பவரின் ரகசியத்தை வெளியே சொல்லக்கூடாது என்பது மத மரபு. இந்த உள்ளடக்கத்தைக் கொண்டு சோ வின் உண்மையே உன் விலை என்ன என்று கோமாளித்தனமாக எடுத்தார்.
நடிகர் நடிகைகளைப் பற்றி ஹிட்ச்காக் எப்போது அலட்டிக்கொண்டதில்லை . அவர்களை கால்நடைகள் என்றே குறிப்பிட்டுள்ளார். அவர்களின் ஈகோவை மசாஜ் செய்தால் அது ஆக்டோபஸ் போல பத்துக்கரங்களால் நம்மைக் கேட்டுக்கொண்டே இருக்கும் நம்மால் திருப்தி செய்ய முடியாது என்பார்.

ஆயிரத்தில் ஒருவர்

ஹிட்ச்காக் அளவிற்கு வேறு எந்த இயக்குனர் படமும் மீண்டும் மீண்டும் தயாரிக்கப்பட்டது இல்லை அணுவை பற்றி உலகம் அறியாதிருந்த காலத்திலேயே அதை உள்ளடக்கமாக கொண்டு படமெடுத்தவர்
யுனிவர்ஸ் பிக்சர்ஸ் தயாரித்த ஹிட்ச்காக்கின் சைக்கோ படத்திற்காக போடப்பட்ட செட்டை இன்றளவும் சுற்றுலா பயணிகளுக்காக காட்சிப் பொருளாக அப்படியே வைத்துள்ளனர். ஹிட்ச்காக் ஒரு ஓவியராக இருந்ததால் பாத்திரங்களின் உருவ அமைப்பு செட் ஆகியவற்றை ஸ்டோரி போர்டில் அப்படியே வரைந்து வைத்து விடுவார். தான் எடுக்கப்போகும் படத்தின் 75 சதவீதத்தை தன் மேஜையிலேயே பார்த்து விடுவதாக ஒரு பேட்டியில் கூறியுள்ளார்.

சிறந்த படமெடுக்க என்ன செய்ய வேண்டும் என்று கேட்டதற்கு ஹிட்ச்காக் சொன்னார் அதற்கு வேண்டியது மூன்று அம்சங்கள் 1.திரைக்கதை 2.திரைக்கதை 3. திரைக்கதை

your comments below.