January 18, 2022

தமிழக அரசு எழுவர் மற்றும் 38 முசுலீம் கைதிகளை விடுதலை செய்யவேண்டும் அய்யா, பழ. நெடுமாறன் அவர்கள் வேண்டுகோள்…

1 min read
Spread the love

தமிழக முதல்வர் அவர்களுக்கு அய்யா, பழ. நெடுமாறன் அவர்கள் வேண்டுகோள் ஒன்றை விடுத்துள்ளார். அதில், முன்னாள் முதல்வர் அண்ணா அவர்களின் 113ஆவது பிறந்தநாளை முன்னிட்டு நீண்டகாலம் சிறையில் வாடும் 700 ஆயுள் தண்டனை கைதிகளை மனிதநேய அடிப்படையில் முன் விடுதலை செய்யப்படுவார்கள் என சட்டமன்றத்தில் முதல்வர் ஸ்டாலின் அவர்கள் அறிவித்த அடிப்படையில் அதற்கான அரசாணை தற்போது பிறப்பிக்கப்பட்டு உள்ளது. 20 ஆண்டுகாலம் சிறைவாசம் முடித்தவர்கள் மட்டுமல்ல, 10ஆண்டுகள் நிறைவு செய்தவர்களையும் விடுதலை செய்வதற்கான விதிமுறைகள் இந்த ஆணையில் வெளியிடப்பட்டு உள்ளன. இதை நான் வரவேற்றுப் பாராட்டுகிறேன்.

இந்த விதிமுறைகளின் அடிப்படையில் இராசீவ் கொலை வழக்கில் நீண்டகாலமாக சிறையில் வாடும் 7 பேர்களையும், கோவை குண்டுவெடிப்பு வழக்கில் நீண்டகாலமாக சிறைவாசம் அனுபவித்துவரும் 38 முசுலீம்களையும் விடுதலை செய்வதற்கு முன் வரவேண்டும் என தமிழக அரசை வேண்டிக்கொள்கிறேன். கடந்த காலத்தில் அண்ணா நூற்றாண்டு விழா போன்ற முக்கிய அரசு விழாக்களின் போது கூட இவர்கள் விடுவிக்கப்படவில்லை. மேலே கண்ட சிறைவாசிகளில் பலர் தற்போது பல்வேறு நோய்களால் பாதிக்கப்பட்டுள்ளனர். ஆனாலும், அவர்களுக்கு கருணை காட்டப்படவில்லை. கீழவெண்மணியில் 44பேர் படுகொலை செய்யப்பட்ட வழக்கில் தண்டிக்கப்பட்டவர்களும், மூன்று மாணவிகள் உயிரோடு கொளுத்தப்பட்ட தர்மபுரி பேருந்து எரிப்பு வழக்கில் தண்டிக்கப்பட்டவர்களும் 10 ஆண்டுகளில் விடுதலை செய்யப்பட்டுள்ளனர்.

சிறைவாசிகளை விடுதலை செய்யும் போது பாரபட்சம் காட்டக்கூடாது என உச்சநீதிமன்றம் வழிகாட்டியுள்ளது. மேலும் 14ஆண்டுகள் சிறைவாசம் நிறைவு பெற்ற கைதிகளை விடுதலை செய்வது மாநில அரசின் அதிகாரத்திற்கு உட்பட்டது என்றும் குறிப்பிட்டுள்ளது. எனவே, மேற்கண்டவர்களை விடுதலை செய்வதற்கு விதிமுறைகள் ஏதேனும் தடையாக இருக்குமானால், சிறப்பு ஆணையின் மூலம் அவற்றை நீக்கி இவர்கள் அனைவரையும் விடுதலை செய்ய முன் வரும்படி தமிழக முதல்வர் ஸ்டாலின் அவர்களை வேண்டிக்கொள்கிறேன். என அந்த அறிக்கையில் தமிழக முதல்வருக்கு வேண்டுகோள் விடுத்துள்ளார்.

G.பாலகிருஷ்ணன்
நிழல் . இன் – 8939476777

Leave a Reply

Your email address will not be published. Required fields are marked *